ഹരിസുധാലഹരി - ഗുരുതോഷിണി - ശ്ലോകം 61

<--മുൻപിലത്തേത് തുടക്കം അടുത്തത് >

"ഇല്ലാ സ്ത്രീപുരുഷാദി ശൈശവവയോവൃദ്ധാദിയാം ഭേദമൊ-

ട്ടില്ലാ വർണ്ണവിവേചനാദിയുമപഭ്രംശാദിയാം ഭീതിയും

എല്ലാക്കാലവുമാർക്കുമേ സുഗമമാണാഭക്തിമാർഗ്ഗം നശി-

ക്കില്ലാ ഭക്തനവൻ ജയിപ്പു നിതരാം സർവ്വോത്തമൻ സർവ്വദാ"

പദാർത്ഥം:

ഇല്ലാ = ഇല്ലാ

സ്ത്രീപുരുഷാദി = സ്ത്രീ, പുരുഷൻ എന്നിങ്ങിനെ (വേർതിരിവ്)

ശൈശവ വയോവൃദ്ധാദി = ശൈശവം, വയസ്സുകൊണ്ടുള്ള വാർദ്ധക്യം

യാം ഭേദം = മുതലായ ഭേദങ്ങൾ

ഒട്ടില്ലാ = ഒട്ടും തന്നെയില്ല

വർണ്ണവിവേചനാദിയും = ചതുർവർണ്ണങ്ങൾ അടിസ്ഥാനമാക്കിയുള്ള വേർതിരിവും

അപഭ്രംശാദിയാം ഭീതിയും = താഴേക്കു വീഴുമെന്നുള്ള ഭയവും

എല്ലാക്കാലവും = എല്ലാ കാലത്തും

ആർക്കുമേ = എല്ലാവർക്കും

സുഗമമാണ് = കടന്നു ചെല്ലാൻ വളരെ എളുപ്പമുള്ളതാണ്

ആ ഭക്തിമാർഗ്ഗം = (വിഷ്ണുവിലുള്ള) ഭക്തിയാകുന്ന വഴി

നശിക്കില്ലാ = ആത്മനാശമുണ്ടാകുന്നില്ല

ഭക്തനവൻ = ആ ഭക്തൻ

ജയിപ്പൂ = ജയിക്കുന്നു

നിതരാം = പരിപൂർണ്ണമായും

സർവ്വോത്തമൻ = എല്ലാവരിലും മീതേ വിശേഷപ്പെട്ടവനായിട്ട്

സർവ്വദാ = എല്ലാ കാലത്തും

ശ്ലോകാർത്ഥം:

സ്ത്രീ പുരുഷൻ എന്ന വ്യത്യാസമില്ല. ശിശു, വയോ വൃദ്ധൻ മുതലായ ഭേദം അല്പം പോലുമില്ല. ബ്രാഹ്മണാദി ചതുർവർണ്ണഭേദമില്ല. നാശഗർത്തത്തിലേക്കു വീഴും എന്നു തുടങ്ങിയുള്ള ഭയവുമില്ല. വിഷ്ണുവിങ്കലുള്ള ഭക്തി, എല്ലാവർക്കും എല്ലാകാലത്തും വളരെ എളുപ്പത്തിൽ കടന്നുചെല്ലാൻ കഴിയുന്ന വഴിയാണ്. ആ ഭക്തൻ ഒരുകാലത്തും നശിക്കുന്നില്ല. എല്ലാവരിലും ശ്രേഷ്ഠനായി എല്ലാകാലത്തും എല്ലാവിധത്തിലും അവൻ വിജയിക്കുന്നു.

വ്യാഖ്യാ:

വൈദിക, താന്ത്രികാദി മാർഗ്ഗങ്ങൾക്കുള്ള അധികാരിഭേദം ഇവിടെ വ്യംഗ്യമാക്കുന്നു. അത്തരം അധികാരം, വർണ്ണഭേദം, ലിംഗഭേദം, വയോഭേദം മുതലായതിനെ ആശ്രയിച്ചിരിക്കുന്നു. എന്നാൽ ഭക്തിമാർഗ്ഗ അത്തരം പരിഗണനകളൊന്നുമില്ല. അതിനെ ആശ്രയിച്ചാൽ സംസാരത്തെ അതിജീവിച്ച്, ജനനമരണങ്ങളെ അതിജീവിക്കുന്നു.